Andelen nynorskelevar har gått ørlite ned det siste skuleåret.
Illustrasjonsfoto: Gorm Kallestad / NTB / NPK
Færre elevar med nynorsk
Time på Jæren aukar mest – med 123 fleire nynorskelevar enn førre skuleår, melder nettavisa
Framtida.no som viser til nye tal frå Utdanningsdirektoratet.
Det er framleis Bjørnafjorden kommune sør for Bergen som har flest nynorskelevar i Noreg. Dei aukar med 72 nynorskelevar til totalt 3163 elevar med nynorsk som opplæringsspråk.
I Rogaland er det òg ein auke i Karmøy på 76 nynorskelevar og 16 fleire i Vindafjord. Alver rett nord for Bergen går fram med 52 fleire nynorskelevar.
Færre elevar
I landet under eitt er det færre elevar med både bokmål og nynorsk, fordi det er færre elevar i skulealder. 554.010 elevar har bokmål som opplæringsspråk, medan 73.493 elevar har nynorsk. Det er 686 færre med nynorsk, og 515 færre med bokmål.
Totalt sett går nynorskandelen i grunnskulen ned frå 11,7 til 11,6 prosent.
Sjølv fleire Rogaland-kommunar har fått fleire nynorskelevar, er det ein nedgang totalt sett i fylket. Det er mellom anna stor nedgang i Klepp som har 131 færre nynorskelevar, og det er 36 færre i Sandnes og 18 færre i Hå, skriv Framtida.no.
Størst nedgang har Møre og Romsdal. Ålesund går mest attende med 98 færre nynorskelevar, medan Hustadvika mistar 49 nynorskelevar.
Nynorskelevar per fylke
Nynorskelevar i fylka (endring frå førre skuleår i parentes):
• Agder: 1314 (-51)
• Innlandet 3226 (-18)
• Troms og Finnmark 1 (-1)
• Vestfold og Telemark 1770 (-54)
• Vestland 36.965 (-186)
• Viken 565 (-23)
• Oslo 1 (0)
• Rogaland 14.242 (-76)
• Møre og Romsdal 15.408 (-269)
• Trøndelag 0 (-6)
• Nordland 1 (-2)
