Etterlyser tiltak mot støy frå E134

Familien Arnøy har budd på Dørheim i Ølen sidan 2009. No vil Linda Arnøy ikkje innfinna seg med å måtta leva med støy frå nesten 1.000 bussar og lastebilar i døgeret.

Grunnlagstal frå utbedringa av Espelandssvingane i Ølensvåg viser at E134 for få år sidan gjennomsnittleg var trafikkert av 4.864 køyretøy i døgeret. Lange køyretøy utgjorde 827 av desse, eller 17 prosent.

Frå Vindafjord kommune fekk Linda Arnøy til svar at støy frå ein riksveg er utanfor deira ansvarsområde. Statens vegvesen peikar på ei måling frå 2017 som viste at det er for lite støy til å setja i verk tiltak etter etaten sine retningslinjer.