Etterlyser skilting til unik bergkunst

Bruteigsteinen på Flåto er éin av fire registrerte helleristningar i Etne kommune. To av desse ligg på Frette (Duesteinen er den andre) i austenden av Stordalsvatnet. Men den ca. 3.000 år gamle bergkunsten ligg nesten som skjulte skattar. Verken frå E134, nede i grenda eller framme ved målet er dei skilta, og søkjer du Bruteigsteinen» på Google Maps hamnar du på Steinfjellet ved Olalia.

Else Merete Frette er ikkje særleg imponert over korleis dette flotte fornminnet blir forvalta i forhold til publikum.

— For oss er det berre kjekt å ha eit slikt kulturminne nesten i hagen, men stor trafikk har det ikkje vore etter at me overtok garden. Ikkje ein gong ein liten parkeringsplass og eit skilt ved den kommunale vegen som peikar på kor du skal gå, er sett opp, seier Frette som er oppvaksen i grenda og som alltid har hatt eit nært og kjært forhold til Bruteigsteinen.