Leiv Haaland med fleire av hobbyane sine rundt seg. Reiser, ikke minst på verdas elvar, møbelsnekring, gamalt medisinsk utstyr og fotoapparat.
FOTO: NILS TOKHEIM
Den siste distriktslegen blir 85 år
Leiv Haaland kom som ung lege til Vindafjord sommaren 1968. Først til Skjold, men Vikedal blei staden har brukte resten av yrkesåra sine og kor han og familien slo seg ned for godt. Denne veka er han 85 år og ser tilbake på ei tid med reisevegar og oppgåver som er totalt framande i dag.
Leiv Haaland blei født på Varhaug 7. oktober 1940. Foreldra var Anne-Margrete Skrettingland og Hans M. Haaland. I helga blei han feira i Vikedal med alle sine, frå Tromsø til Grimstad.
I etterkrigstida var det gode pengar å tena for ungdomar på Jæren med å henta stein, riva ugras, tynna i rotvekster og henta poteter. I ferieane frå han var fjorten år gamal drog han dagleg til Stavanger med toget for å jobba som ærendgut, og seksten år gamal var han malar på Varhaug. Då han var atten år gamal blei han vaktmeisterassistent på Nærlandsheimen. Der møtte han kona, Jorunn.
Den arbeidssame guten var skuleflink, så han tok realskule og gymnas på Bryne i åra 1955-1960. Det bar rett inn på legestudiet på universitetet i Oslo hausten 1960, kor han var ferdig i 1966. Turnustida tok jærbuen på Haugesund sjukehus og i Sveio, og den første legejobben fekk han i Skjold i 1968. Der var han i halvanna år som kommunelege og konstituert distriktslege, før han hamna fast som distriktslege i Vikedal, kor han og kona framleis bur.
