Cup der alle er vinnarar

Det er heilt perfekt cup-vêr i Vikebygd denne laurdagen. Sola skin gjennom lett skydekke, og det luktar fotball og blaut grasbane, for det er ganske sølete på banane, men det ser ikkje ut til å plage dei ivrige fotballspelarane som har møtt opp. Det er mykje energi å spore og publikum ser ut til å kose seg i vårsola.

Speleglede

— Det handlar om å starta sesongen på ein morosam måte. Målet er å motivera og få fram spelegleda hos barn heilt ned i 6-års alderen. Det vert ingen kåring av vinnarar på denne cupen. Her er alle spelarane lika viktige og alle får same premie, fortel turneringsleiar Rune Hetland.