Berre fire av ti bruker hjelm kvar gong dei syklar

Kvar tredje syklist bruker sjeldan eller aldri hjelm når dei ferdast på to hjul. Berre fire av ti bruker hjelm kvar gong dei syklar, ifølgje Trygg Trafikk.

– Alle kan gjere feil i trafikken og uhell skjer, men det er dumt å la manglande utstyr definere utfallet av ein tur, seier spesialrådgivar Ann-Helen Hansen i Trygg Trafikk i ei pressemelding.

Tala kjem fram i ei ny undersøking YouGov gjorde mellom 23. og 28. april blant 1000 personar over 18 år. Av dei var det 476 som svarte at dei hadde sykla dei siste tolv månadene.