Ber regjeringa sikre midlar til marin folkehøgskule

Campus Blå ønskjer å bli ein folkehøgskule med fokus på marine fag. Dagleg leiar håpar regjeringa foreslår oppstartstilskot til skulen.

– I generasjonar har vi hausta av ressursane havet gir oss. Havet er ein stor del av identiteten og historia vår, og representerer òg verdiskapinga i framtida. På Campus BLÅ ser vi store moglegheiter i havet, og brenn for å formidle vidare kunnskapen og engasjementet vårt til ungdom, skriv dagleg leiar Liv Bentzen på Campus Blå i Brønnøysund i ein kronikk i Fiskeribladet.

Bentzen peikar på at om ein skal vi innfri vekstambisjonane som politikarar, forvaltning og samfunnet har, så krevst det investering i kunnskap. Ho viser òg til at Noreg i dag har 84 folkehøgskular med nærare 800 ulike linjer, men ingen skular med havet i fokus.