Sigbjørn Melvær som saman med Ole Håkon Steffensen er gruppa Gnist, gjennomførte eit svært vågalt nummer. FOTO: ÅSE HJELMERVIK

Åse Hjelmervik

Konferansier og festivalhøvding Frank Abelseth ønska store og små velkommen til familieshow i festivalteltet i Vikedal.

Det såg ut som dei mange frammøtte på showet i Vikedal koste seg, dei fekk til og med sjansen til å vere med å bidra på allsong. For som Zporty-general Frank Abelseth sa frå scena; dei som ikkje syng, dei har kjærast.

Først ut av deltakarane på scena var beatboxaren  Severin Årthun frå Sauda. Unge Årthun imponerte stort med si framføring, og innrømte etterpå at han øver ganske mykje for å få det til.  Etterpå var det sjølvaste vokalisten i Ole Ivars som gjekk på scena, parodiert av Kurt M. Johansen frå gruppa Synth å Le. Johansen fekk fram latteren blant publikum med sin standup og parodiar av kjente skikkelsar.

To som absolutt kan beskrivast med slagordet til Zportyfestivalen, ”Litt livsfarlig”, var Sigbjørn Melvær og Ole Håkon Steffensen som utgjorde gruppa Gnist. Dei framførte eit stilig nummer som besto av sjonglering av kjegler, ballar, sablar og flammar. Då dei sjonglerte til kvarandre med flammar og sablar var det nok ikkje berre Grannars utsendte som hadde hjarta i halsen, og dei hausta stadig vekk applaus frå eit imponert publikum.

Cheerleadarane The Triplets, som består av Marte Øygard, Kine Eikemo og Michelle Selland frå Sauda, hadde sjølv tatt kontakt med Frank Abelseth for dei hadde så lyst å opptre i Vikedal. Dette sa han sjølvsagt ja til, og dei gjennomførte eit svært stilig og ”zporty”  nummer, til stor jubel frå salen.
Festivalhøvdingen sjølv, Frank Abelseth, kunne ikkje anna å skryte over det flotte publikummet på både showet og Zportyfestivalen generelt.
—  Det er så mange som er med å bidrar, og det set eg utrulig stor pris på, fortel han. Han kunne fortelje at zportyfestivalen hadde ein liten nedgong i deltakartal, 16-1700 mot 2000 året før. Dette til tross for at fleire av aktivitetane var fullbooka og vel så det.

Les meir i Grannar på torsdag