Ingenting fekk publikum med seg på konserten i Viekdal fredag. Foto: Linn Heidi Stokkedal

Bjørn K. Kjellesvik

Etter litt tekniske utfordringar kom Bjørn Hellfuck i gong med sin konsert i teltet i Vikedal. For mange var dette eit høgdepunkt, og den maskerte, kjolekledde bergensaren skuffa ikkje. Konserten utvikla seg til ein energisk affære der Hellfuck og sine maskerte musikarkompisar skapte eit enormt trykk. Teltet var ikkje fullpakka, men dei som stod føre scena kompenserte med stort engasjement og entusiasme.

Når den store hiten "Krabbeklo" vart framført på slutten av konserten, vart det plutseleg mange fleire som entra teltet, og allsongfaktoren var på maksimalt nivå. Etter Hellfucks overbevisande opptreden var det Stavanger-bandet Ingenting sin tur til å vinne over publikumet i Vikedal. Dette skulle vise seg å vere ei overkommeleg oppgåve for siddisane. Dei gamle heltane drog både yngre og eldre fram mot scena, og konserten deira fylla opp teltet, og heva stemninga endå eit hakk frå Bjørn Hellfuck si framføring. Folk dansa, både på golv og bord, og song med til alle dei gode gamle slagarane til Ingenting kom som perler på ei snor.

Blant eit allereie smilande publikum vart humøret heva eit ytterligare hakk av dei etter kvart så rutinerte Stavanger-karane. Ein kan trygt seie at festivalveka i Vikedal vart avslutta med eit ordentlig smell. Arrangørane var også veldig nøgde.
— Det var om lag 1500 mann inne på fredagskvelden, medan det var rundt 1000 på dans dagen etterpå, fortel festivalsjef Georg Opsahl.

Han påpeikar at dette er positive tal, spesielt med tanke på det varierande vêret som herja distriktet i helga. Opsahl er også veldig nøgd med bandet Ingenting.
— Det fylte seg opp i teltet når dei entra scena, men det var også ein suksessoppskrift med kombinasjonen av Bjørn Hellfuck og Ingenting, forklarar han.


Les meir om Sommarfestivalen og fiskekonkurranse i Grannar på torsdag