Forpaktarparet overtok garden i 2008, og avtalt forpaktingstid var på 30 år. Etter at Arbeidstilsynet og Mattilsynet var på Tesdal i februar blei mjølkekyrne flytta frå garden, då bygningen ikkje var i forsvarleg stand. Foto: Espen Mills

Kari Aakra

Førre veke blei tiltredingskjønnet for Tesdalgarden lagt fram. Eigarane av den tidlegare jordbrukskulegarden i Etne, Vestnorsk senter for bygdeutvikling (VSUB) får etter dette eitt år på seg til å setja i stand driftsbygningen på garden.

— Skjønnsnemnda finn at driftsbygningen ikkje er i ordentleg og forsvarleg stand ved tiltredinga. Dei berande konstruksjonane i bygningen er så svekka at det i alle høve vil vera naudsynt med tiltak, kort- eller langsiktige, for at vesentlege deler av bygningen i det heile skal kunna nyttast, skriv skjønnsnemnda beståande av Halldor Skare, Ole Nervik, og advokat Haldor Tveit.

Bakgrunnen for skjønnet er den pågåande strida mellom forpaktarparet Viola og Ronald Krüger som i 2007 inngjekk pakteavtale med VSUB. I februar stengde Arbeidstilsynet og Mattilsynet driftsbygningen, som skjønnsnemnda nå meiner stiftinga er forplikta til å ta kostnaden med å setja i stand. Forpaktarparet sin advokat Jens Otto Haugland er nå uviss på kva neste steg blir.

— Me har ikkje fått noko talfesta kva det vil kosta å setja i stand bygningen. Nå må me heller diskutera kva steg som er mest hensiktsmessig å ta vidare, seier Haugland til Grannar.
I følgje Muliticonsult sin tilstandsanalyse som blei lagt fram for nærare eitt år sidan, gjekk det fram at bygget hadde nådd sin tekniske levealder, og rehabilitering av driftsbygningen blei fråråda. Haugland meiner det difor kan vera eit betre alternativ å heller byggja nytt enn å setja i stand bygningen.

Det har ikkje lukkast Grannar å få kommentar til saka frå  stiftinga sin advokat Helge Talmo, eller styreleiar i stiftinga, Audun Namtvedt.